Па стане на 01.01.2026 г. у вобласці налічваецца 24 установы па профілі музейнай дзейнасці, у тым ліку: комплексных — 16, гістарычных — 7, мастацтвазнаўчых — 1. На працягу года ўсе музейныя ўстановы вобласці вялі работу па асноўных напрамках дзейнасці: навукова-даследчай, экспазіцыйна-выставачнай, навукова-асветніцкай, навукова-фондавай.
Былі папоўнены калекцыі археалогіі, палеанталогіі, жывапісу, графікі, скульптуры, дэкаратыўна-прыкладнога мастацтва, прадметаў побыту, ткацтва і вышыўкі, друкаваных выданняў, дакументаў і фатаграфій.
Актыўна вялася экспазіцыйна-выставачная работа, накіраваная на далучэнне жыхароў вобласці да гісторыка-культурнай спадчыны рэгіёна, гераічнага мінулага краю. Шэраг выстаў быў прымеркаваны да важных дзяржаўных і палітычных падзей у гісторыі краіны.
У мэтах прыняцця дадатковых мер па пашырэнні маршрутаў ваенна-гістарычнага турызму з уключэннем у іх месцаў масавых пахаванняў ахвяр генацыду і іншых аб’ектаў памяці перыяду Вялікай Айчыннай вайны падрыхтаваны прапановы дзяржаўных музейных устаноў аб уключэнні ў турыстычна-экскурсійныя маршруты памятных месцаў, пахаванняў ахвяр вайны, месцаў баявой славы, мемарыяльных комплексаў, іншых формаў увекавечання памяці загінулых у ходзе Вялікай Айчыннай вайны на тэрыторыі вобласці.
Дзяржаўнымі музейнымі ўстановамі вобласці праводзіцца работа па рээкспазіцыі пастаянна дзеючых экспазіцый, прысвечаных Вялікай Айчыннай вайне, з прадстаўленнем тэмы генацыду беларускага народа.
Акрамя гэтага, з мэтай давядзення да грамадзян, асабліва да падрастаючага пакалення, поўнай і аб’ектыўнай інфармацыі пра злачынствы фашыстаў і іх пасобнікаў, недапушчальнасці рэабілітацыі нацызму, арганізаваны шэраг фотадакументальных выстаў з фондаў музеяў.
У 2025 годзе музей ваеннай славы стаў арганізатарам шматлікіх мерапрыемстваў, прысвечаных знакавым і памятным датам у нашай гісторыі. Гэта ўрокі мужнасці, дні жывой гісторыі, пасвячэнне ў юныя патрыёты, зарніцы, квесты, віктарыны.
У рамках работы па ваенна-патрыятычным выхаванні падрастаючага пакалення чацвёрты год запар дзейнічае дзіцячы патрыятычны палатачны лагер «Юны партызан», які размясціўся на базе ваенна-гістарычнага комплексу «Партызанская крынічка».
Дзяржаўная гісторыка-культурная ўстанова «Гомельскі палацава-паркавы ансамбль» — адна з найстарэйшых устаноў культуры музейнага тыпу ў краіне. У 2025 годзе музей Гомельскага палацава-паркавага ансамбля адзначыў сваё 106-годдзе.
Збор музея Гомельскага палацава-паркавага ансамбля — адзін з найбагацейшых у краіне. У 2025 г. у музейны фонд Гомельскага палацава-паркавага ансамбля паступіла 676 прадметаў асноўнага фонда (усяго — 180 644) і 364 прадметы навукова-дапаможнага фонда (усяго — 90 216).
Установай арганізавана 48 часовых экспазіцый (26 з іх па-за яе межамі). У сценах музея працавалі міжнародныя праекты «Аляксандр Сяргеевіч Грыбаедаў як з’ява рускай гісторыі і культуры» (музей-запаведнік А. С. Грыбаедава «Хмеліта»), «Культурныя і гістарычныя сувязі Браншчыны і Беларусі» (Бранскі дзяржаўны краязнаўчы музей) і «Захаванае дзяцінства» (Белгародскі музей народнай культуры). Выставачныя праекты Гомельскага палацава-паркавага ансамбля былі прадстаўлены на міжнародных пляцоўках (Бранскі дзяржаўны краязнаўчы музей, дзяржаўны ваенна-гістарычны музей-запаведнік «Прохараўскае поле», Дзелавы і культурны комплекс Пасольства Рэспублікі Беларусь у Расійскай Федэрацыі), у музейных установах Гомельскай вобласці, установах культуры і адукацыі г. Гомеля.
У мэтах паляпшэння якасці паслуг, якія прадастаўляюцца ў музеях вобласці, атэстацыю ў Нацыянальным агенцтве па турызме ў якасці гідаў-экскурсаводаў прайшлі 59 спецыялістаў музейных устаноў вобласці. У атэставаныя турыстычныя маршруты ўключана 268 гісторыка-культурных каштоўнасцей (289 аб’ектаў спадчыны).