Прыгодніцкая камедыя, трылер, сямейная драма. Дні індыйскага кіно пройдуць у Гомелі

Фестываль "Дні індыйскага кіно", які падорыць магчымасць бліжэй пазнаёміцца з багатай і самабытнай культурай Індыі і прычыніцца да яе традыцый, пройдзе ў Гомелі з 20 па 22 сакавіка ў кінатэатры "Мір", паведамілі БЕЛТА ў дзяржаўным прадпрыемстве "Гомелькінавідэапракат".

Такое мерапрыемства будзе праводзіцца не першы раз. "Вопыт мінулага фестывалю паказаў, што гамяльчанам цікавы індыйскі кінематограф", - падкрэслілі ў арганізацыі.

Як чакаецца, у адкрыцці фестывалю прыме ўдзел Надзвычайны і Паўнамоцны Пасол Рэспублікі Індыя ў Рэспубліцы Беларусь Ашок Кумар.

У час чарговага кінафестывалю жыхарам абласнога цэнтра будуць прапанаваны да прагляду тры разнапланавыя па тэматыцы і жанрах кінастужкі, якія заваявалі поспех гледачоў не толькі ў Індыі, але і далёка за яе межамі.

Адкрые кінафестываль прыгодніцкая камедыя "Жыццё не можа быць сумным!" (2011 год, рэжысер Зоя Ахтар). Фільм раскажа пра сяброў дзяцінства Арджуна, Імрана і Кабіра, якія, усвядоміўшы, што жыццё праходзіць міма іх, вырашаюць адправіцца ў падарожжа, каб дапамагчы адзін аднаму ажыццявіць усе запаветныя мары. Карціна ўдастоена некалькіх кінематаграфічных прэмій у намінацыі "Лепшы фільм года".

У працяг кінафестывалю гледачам прадставяць трылер "Адзін у полі воін" (2023 год, рэжысёр Апурв Сінгх Каркі) пра звычайнага сумленнага і прыстойнага чалавека, які кідае выклік сістэме, разумеючы, што праўда на яго баку.

Завершыць кінафестываль сямейная камедыйна-драматычная кінастужка "Бывай" (2022 год, рэжысёр Вікас Бал). У цэнтры сюжэта - кранальная гісторыя сям'і Бхала, у якой расказваецца пра іх шляхі смутку і самапазнання пасля страты блізкага чалавека.

Усе кінастужкі будуць суправаджацца рускімі субцітрамі, удакладнілі ў дзяржаўным прадпрыемстве.

Наведвальнікі фестывалю змогуць не толькі ўбачыць індыйскія фільмы, але і акунуцца ў атмасферу гэтай дзіўнай культуры. У фае кінатэатра будзе гучаць музыка з папулярных індыйскіх фільмаў. Таксама аб яркіх момантах жыцця ў Індыі раскажуць тэматычныя фотазоны і выстаўка дзіцячых малюнкаў, падрыхтаваная Цэнтрам творчасці дзяцей і моладзі Навабеліцкага раёна Гомеля.

Уваход на адкрыццё фестывалю і кінасеансы свабодны.