"Кожны спектакль з поўнай залай". Дулава аб наведвальнасці Вялікага тэатра

Сярэдняя наведвальнасць Вялікага тэатра ў 2024 годзе склала 85 працэнтаў, паведаміла генеральны дырэктар Нацыянальнага акадэмічнага Вялікага тэатра оперы і балета, удастоеная медаля Францыска Скарыны, Кацярына Дулава на сустрэчы з журналістамі, перадае карэспандэнт БЕЛТА.

"Тое, што адбываецца цяпер, - гэта, вядома, вялікае шчасце", - сказала Кацярына Дулава, маючы на ўвазе высокую наведвальнасць і запатрабаванасць Вялікага тэатра. Генеральны дырэктар не выключыла, што такая наведвальнасць, магчыма, была ў дакаранавірусны час, але ў пачатку яе работы ў тэатры (са студзеня 2022 года. - Заўвага БЕЛТА) назіралася зусім іншая карціна.

Паводле слоў Кацярыны Дулавай, у 2024 годзе тэатр наведалі амаль 245 тыс. гледачоў, сярэдняя запаўняльнасць залы склала 86 працэнтаў. За студзень - люты 2025 года запаўняльнасць склала больш як 95 працэнтаў - гэта вялікае значэнне для такога грандыёзнага тэатра, дзе 1,1 тыс. месцаў. Наведвальнасць у студзені і лютым гэтага года - 95 працэнтаў.

Кожны спектакль праходзіць, па сутнасці, з поўнай залай, адзначыла генеральны дырэктар. Нават на тых спектаклях, да якіх, як ёй здавалася, публіка ставіцца насцярожана і прымае няпроста, - 100-працэнтная запаўняльнасць. Усё гэта сведчыць аб вялікім інтарэсе з боку гледачоў.

Папулярызацыі Вялікага садзейнічае шэраг мерапрыемстваў, лічыць гендырэктар. "Чаго толькі варты ўдзел у "Марафоне адзінства"!" - заўважыла Кацярына Дулава. Яна прызналася, што была збянтэжана, калі ёй паступіў званок з прапановай паўдзельнічаць у гэтай акцыі. Паводле яе слоў, складана было ўявіць артыстаў у непрывычнай прасторы або вывезці экспазіцыю музея, якая наогул ніколі не пакідала яго сцены. Але інтарэс з боку насельніцтва аказаўся неверагодным.

"Тое, што нашы артысты выкладалі, тое, што дзеці маглі ўбачыць за два крокі ад сябе народную артыстку, музыкантаў, якія прапаноўвалі пагуляць, - вялікая справа. Сам факт такога ўзаемадзеяння быў грандыёзным. Плюс выступленні нашых зорак у вячэрніх канцэртах - яны цудоўна ўпісаліся са сваім рэпертуарам", - сказала Кацярына Дулава, дадаўшы, што гэта акцыя надала Вялікаму тэатру новыя адценні.

Гендырэктар таксама нагадала, што люты гэтага года ў тэатры прайшоў пад знакам балета. Размова ідзе аб праекце "Жыццё ў прафесіі". Гераінямі праекта сталі Ірына Яромкіна, Людміла Хітрова і Марына Вежнавец. Галоўны балетмайстар Вялікага тэатра заслужаны артыст Беларусі Ігар Колб на гэтым, лічыць Кацярына Дулава, не спыніцца. Плануецца мужчынскі праект са сваім фарматам правядзення. да спісу навін